الرئيسيةالتسجيلدخول

شاطر | 
 

 4 - حبرشني يا حبرشني, انسي يا معلم القعدة المرادي ناااااااار

اذهب الى الأسفل 
كاتب الموضوعرسالة
Foda
Admin
avatar

ذكر
عدد الرسائل : 229
العمر : 30
الموقع : www.as7abak.yoo7.com
العمل/الترفيه : Writing - Acting
المزاج : مجروح
تاريخ التسجيل : 15/02/2008

مُساهمةموضوع: 4 - حبرشني يا حبرشني, انسي يا معلم القعدة المرادي ناااااااار   السبت مارس 01, 2008 2:13 am

سيداتي انساتي سادتي ننقل لكم احداث المباره الهامه بين فريقي بركه السبع والسنبلاوين

المباراه اانهارده تحمل شعار اكون او لا اكون لان في حاله الفوز سوف يتوج الفريق الفائز بطلاً للدرجه التاسعه وسوف يحصل
النادي الفائز علي مكافئه قدرها فحل جاموس لباني وقد اعلن عمده كفر امونه قبل بدايه المباره عن هديه للفريق الفائز قدرها معزه لكل لاعب بهدف زياده اصرار اللاعبين علي تقديم مباراه ممتعه لكل الجماهير خصوصا ان المباره مزاعه علي كل القنوات الفضائيه تقريباً

وانهارده بنتمني تسود الروح الرياضيه المباره لانها هي الهدف الاساسي من اقامه مثل هذه البطولات والخسران كسبان زي ما بيقولوا وكفايه انه وصل للنهائي وجووووووووووووووووووون

هالا هالا عليك هالا هالا عليك

رمضان خنوفه بيحرز الهدف الاول في الدقيقه الاولي لتصبح النتيجه 1\0 لفريق بركة السبع ايه ده يبني ايه ده يبني

شفتوا استلم الكوره ازاي وادي الاعاده قدام حضراتكم خد الكوره علي سدره الشراب اتقلع مهموش وكمل برده الفرده التانيه طارت ولا فكر حتي كمل بروح قتاليه وعدي من واحد والتاني وبروز الحكم اللي كان واقف علي خط الجون ليحرز اجمل اهداف البطوله حتي الان

سيد افندي : مالك ياد يا مصري مش منسجم مع الماتش ليه ده حتي الماتش جامد اوي والجون المبكر ده حيشعلل المباره

انا : والله يا سيد افندي بالي مشغول شويه خليكوا انتوا في الماتش انا داخل جوه اريح شويه

رمزي بيه : خد يا مصري رايح فين خد يبني تعالي بس امااقولك

سيد افندي : ماتقوم يا تيتو تشوف المصري زعلان من ايه انتوا شباب يبني زي بعض

المعلم حنفي : فشر شباب عن شباب يفرق بقي الخنفس ده يبقي زي المصري ابو الرجاله الشاب اللي يفرح اللي دماغه تقلها دهب

سيد افندي : وماله يا معلم حنفي برده هما من سن بعض ويفهموا بعض اكتر مننا

تيتو : انا حقوم اشوفه ماله

رمزي بيه : قوم يبني ربنا يباركلك قوم


وفي اوضه النوم >>>>>>> دخل تيتو لاقاني مأنتخ علي السرير وضارب عيني في السقف ومش حاسس باللي حواليا

تيتو : مالك يا مصري سيبت القعده ليه ده المزاج حلو انهارده والماتش محلي القعدة

انا : تيتو هو انا شكلي وحش ؟؟

تيتو : مين اللي قال كده بس مالك ياعم مانت طول بعرض اهو ماشاء الله اللهم لا حسد

انا : ياعم مش الفكره بس انا حاسس كده بحاجه غريبه اليومين دول

تيتو : ايه حاسس بايه ؟ امساك ؟ اكيد من شرب الشاي كتير فكك ياعم وقوم خدلك حبايه ملين وربنا حيفك ديقتك

انا : امساك ايه جتك نيله في ملافظك انا اقصد حاجه تانيه

تيتو : يبقي هي مفيش غيرها >> البواسير بنت الكلب مانت يبني لسه عامل العمليه من سنه هي رجعت تنقح عليك تاني ؟

انا : الله يخرب بيتك انت غبي ياد مبتفهمش

تيتو : ياعم طب خلصنا مالك في ايه عاوز الحق اكمل الماتش الواد ابراهيم حنكوره في الفورمه انهارده والجماهير حتتجنن عليه حتي البنات بيموتوا في شعره اللي كل مره يصبغه لون تاني انهارده صابغه اخضر زرع بس ايه يجنن يا مصري

انا : الله ينور عليك البناااااااااااات انت كده وصلت لمربط الفرس

تيتو : ياعم لا ده مش فرس انهارده الجائزه فحل لباني الفرس ده في الكاس بتاع المحافظه

انا : يوووووووووووووووووووووه ماتبطل غباء بقي وافهمني ... انا ملاحظ يا تيتو ان انا ماليش علاقات نسائيه زيك كده وزي الشباب كلها يعني كل شاب بيبقي ماشي مع خمستاشر ستاشر بنت ومقضيها الا انا لدرجه اني خلاص مبقتش طايق اشوف نفسي في المرايا

تيتو : يا مصري مسمهاش بنت اسمها مزه وبعدين مانت يا اخي اللي عامل في نفسك كده انت السبب

انا : اناااااااااااا ؟؟!!!!! ان السبب ازاي

تيتو : ايوه انت مانت اللي بتلبس لبس غريب محدش بقي يلبسه ده فات عليه قرن يا اخي وايه الجلابيه اللي انت لابسها دي في شاب في سنك يلبس جلابيه ؟

انا : ومالها الجلابيه امال حقعد في البيت بايه ؟ بقميص نوم ؟ وبعدين ماله لبسي يا حمار انت مانا بلبس قميص وبنطلون وكرافته ده كرافته واحده من بتوعي تقف بتمن طقم هدومك اللي انت لابسه ده كله

تيتو : ايوه مقلناش حاجه بس ناقصك بقي الطربوش ابو زر وترجع بقي لايام ثوره يونيو بتاعه سنه 59 دي

انا : يا خبرك اسود كمان مش عارف الثوره كانت امتي الثوره كانت في شهر يوليو سنه 52 يا عديم الاهليه

تيتو : ياعم ثقافه ايه بس في الحر ده اهم حاجه الاستايل

انا : استايل ازاي يعني هو انا بشتري تلاجه متفهمني ياعم انت

تيتو : مانت يبني طول مانت شاغل نفسك بالقراءه والثقافه وطول ما لبسك كده عمر البنات ما حتبصلك ابدا

انا : امال حتبصلي امتي يا حيله امك ؟؟

تيتو : لما تبقي شاب روش وبتعرف تلبس وتتكلم في الحاجات اللي هما بيحبوا يسمعوها

انا : وايه بقي ياتري الحاجات اللي بيحبوا يسموعها دي

تيتو : دي سهله خالص بس عاوزه تدريب يعني شويه سهوكه علي حنيه علي مياعه وكلمتين في الحب واغنيه سخنه من بتو كاظم الساهر ولو البت استايل اوي ومودها اجنبي يبقي تقضيها بقي انريكي وريكي مارتن واشر والحياه حلوه

انا : يعني مينفعش فاجنر ومتسارت وباخ ؟

تيتو : مين الاتنين الاولانيين دول ؟ بس باخ ينفع البنات بتموت فيه علشان اللمبي حسن حسني كان عمل دوره تحفه

انا : الله يخرب بيتك الله يخرب بيتك الله يخرب بيتك ياحمار الموسيقار العالمي باخ مش حسن حسني في اللمبي

تيتو : ياعم انا عمري ما سمعت عنه المهم مش حوارنا

انا : طب ايه الحل انا لازم اعرف بنات كتير انا بدأت اكره نفسي اوي

تيتو : الحل عندي بس تسمع كلامي بالحرف الواحد

انا : اسمع كل للي تقول عليه انا من ايدك دي لايدك دي

تيتو : طب يالا منضيعش وقت قوم نشتريلك شويه هدوم جديده

انا : وهو لازم الهدوم دي يعني منا لسه شاري بدلتين جداد بالشيء الفلاني

تيتو : ياعم قوم بدلتين ايه وبتاع ايه انساهم خلاص مينفعوش مع النيولوك اللي حعملهولك

انا : ياعم دي البدله واقفه ب 800 جنيه حرام عليك

تيتو : انت حتقوم ولااااااا

انا : خلاص حقوم وامري لله يالا يا سيدي


المباراه الان في قمه الاثاره والمتعه مش ممكن يا جماعه اللي بيحصل ده ابراهيم حنكوره حط اربع اجوان بصدره ومع كل جون يشاور ناحيه قلبه قدام شاشات التليفزيون انا سامع ان في حالات اغماء كتير من فتيات في مختلف المحافظات من عشاق ابراهيم حنكوره الكل بيمني نفسه يفوز بقلب الفتي ذو الشعر الاخضر .. وادي ابراهيم حنكوره بيباصيها لسيد المفش ترجع تاني لابراهيم وان تو جميله .. عرضيه الناحيه التانيه توصل لاسماعيل باللو اسماعيل مخدش باله منها كان واقف بيلعب في مناخيره يقطعها شريف الموس وهجمه مرتده خطيره ووو ....... الخ


طبعا انا سمعت الكلام ده زاد اصراري علي اني انفذ كل تعليمات تيتو وقلت بكل فخر : يالا ياتيتو انا معاك يا باشا

المعلم حنفي : رايح فين يا مصري تعالي ده الماتش نااااااااار

انا : ساعه كده وراجهع يا معلم حروح مشوار انا وتيتو

سيد افندي : وماله يبني روح زي مانت عاوز يمكن تروق شويه

المعلم حنفي : طب سيبك من الواد الخنفس ده وتعالي نروح نقعد علي القهوه شويه انا وانت نلعب عشرتين طاوله

رمزي بيه : سيبهم بقي يا معلم حنفي يروحوا مشوارهم روحوا انتوا يا شباب بس متتاخروش علينا علشان نكمل القعدة

انا : يالا ياتيتو احنا حنقف نسمع كتير



مشينا في الطريق وشفت العجب كاني اول مره امشي في شوارع المحروسه قلت للواد تيتو تصدق ياد يا تيو ان دي اول مره امشي معاك !! رد عليا وقالي مانت علشان خايب وماشي ورا شويه ناس من العصر الحجري انت لو كنت بتمشي معايا مكنش بقت حالتك متأخره اوي كده بس الحمد لله حنقدر نعالجها بس ادعي بس ربنا يقدرني المسؤليه صعبه اوي وكبيره يا مصري وطبعا انا خدتني الجلاله وكجزء من العرفان بالجميل قلتله : معلش ياتيتو قدها وقدود ياراجل امال احنا اصحاب ليه


تيتو : شايف البنت اللي هناك دي

انا : اه ياخبر ابيض ايه القمر ده وايه اللي هي مش لابساه ده ازاي اهلها مشوها في الشارع كده

تيتو : ههههههههههههه ايه يا مصري انت زي مايكون مشفتش بنات قبل كده دي محترمه جدا يبني

انا : دي !!!!!! محترمه امال قليله الربايه تبقي ماشيه ازاي في الشارع ؟ ملط ؟؟؟!!

تيتو : تعالي يا جاهل اما اوريك الفرق بيني وبينك في التظبيط

انا : لا بلاش ياتيتو وانبي احسن اخوها ولا ابوها يطلع واقف ويشوفنا يلم علينا الناس

تيتو : ودي فيهاايه يبني ابهات اليومين دول سبور مفيهاش حاجه لماتعجب ببنته وتقف تتكلم معاها شويه وتاخد تليفونها

انا : للدرجادي !! ده انا مكنتش عايش في الدنيا بقي

تيتو : وهي دي دنيا يا راجل شغل في شغل في شغل وبتقول عليها دنيا

انا : طب وريني يافالح حتظبطها ازاي وانعمه ما حتعبرك

تيتو : تراهني حاخد نمره تليفونها فياقل من دقيتين ؟

انا : هههههههههههههه عشم ابليس في الجنه اراهنك علي 100 جنيه

تيتو : اوك وانا موافق



طبعا انا كنت واثق اني حكسب الرهان ده قدامه ساعتين لما تكلمه ده ان بصتله من اساسه لكن بعد ثواني اكتشفت ان الواد علي حق اول ما راح عليها البت ضحكتله هوو الواد سلم عليها وقعدوا يهذروا ويضحكوا شويه لاقيته مطلع موبايله وبيكتب نمرتها
يابن الكللللللللللب بقي ده كله يطلع منك وانا قاعد زي خيبتها من الشغل للكيف مع المعلمين ده انا باين عليا كنت حمار وانا مش عارف


تيتو : ها ؟؟ ايه رايك تحب تاخد نمرتها ؟

انا : لا ياعم انا عاوز اوصل لمرحله الاكتفاء الذاتي والاعتماد علي النفس

تيتو : يالا يا معلم وانا حكحرتك

انا : تكحرتني ؟؟!!!!! ايه الالفاظ دي ربنا يستر عليا ومتجننش



اول محل دخلناه كان شكله غريب حسيت طبعا زي مايكون انا عريان وسط الناس اللي جوه كلهم بيبصولي زي ما يكون عاوزين يقولوا ودهايه اللي جابه هنا ده المهم ععلشان مطولش عليكم وقفت علي الفاترينه مش عارف اختار ايه او بمعني اصح مش عارف ايه ده

الواد تيتو فجأه لاقيت عنيه نوورت وقالي وااااااااااااااو البنطلون ده تحفه يا مصري حيخليك جنان

انا : بنطلون ايه ده يا تيتو سلامه نظرك ده مقطوع من علي الركب ده وشكله قديم اوي زي مايكون كانوا بينفضوا بيه الفاترينه ونسيوا يشيلوه بعد ما خلصوا تنفيض

تيتو : تنفيض ايه يا جاهل استني بس البنطلون ده علي التي شيرت الاحمر ده حيبقي جنان ونشوفلك كوتش من التوكيل علشان الوجاه تكمل علي شويه اكسسوارات من اللي هناك دي تبقي تمام

انا : اكسسوارات ايه يبني ده الحاجات دي حريمي انت عاوز تلبسني سلسله وغوايش

تيتو : اهمد ياد واسمع الكلام خليني احبرشك علي مزاجي

انا : طيب يا اخويا حبرشني زي مانت عاوز



والان سيداتي انساتي سادتي حانت لحظه التتويج بركه السبع في المقدمه اه اه يا فريق الاحلام جماهيرك حتبات فرحانه اليوم وكل يوم يااااااااه مشوار طويل يا بطل اجتزته بنجاح والان السلام الوطني لجمهوريه مصر العربيه

تران تررري ران ران راره ...... الخ

سيد افندي : اهلا اهلا يبني اتفضل ضيف تيتو يبقي ضيفنا .. امال فين المصري يا تيتو

المعلم حنفي: هي ناقصه خنافس جايبلي واحد معاه تاني

رمزي بيه : اتفضل يا كابتن امال فين المصري صحيح يا تيتو هو مجاش معاك ليه ؟

انا : ايه يا جماعه انتوا معرفتونيش ولا ايه ( بركاتك يا تيتو اظاهر النيولوك طلع في التمام )

المعلم حنفي : يا نهارك اسود ايه اللي انت عامله في نفسك يا مصري ده انت اتعديت من الخنفس ابن ال .... ده ؟

انا : اهدوا يا جماعه واسمعوني انا ححكيلكم كل حاجه بالتفصيل البدايه كانت لما ............

واديني اهو قدامك ايه رايكم بقي ؟؟؟؟






معلش يا جماعه مش حقدر اقول اللي سمعته منهم لاسباب شخصيه تتعلق بكرامه الكاتب انما يكفي انكوا تعرفوا انهم سابوني ومشيوا

سابوني افكر

وافكر

اللي انا عملته صح ؟

كرامتي واحترامي لنفسي ولا الاستايل والموضه

مش عارف مبقتش قادر اركز

لو رضيت الناس الكبار ورضيت احترامي لنفسي مش حيعجب البنات

ولو عملت زي البنات ما عاوزه وعملت نيو لوك مش ححترم نفسي ولا حد حيحترمني

بس انا عاوز البنات

منا برده عاوز احترامي وشخصيتي واصالتي

مش عارف انا تعبت

عندك انتم راي ؟؟

ارجوكم قولوا حاجه

بس خلي بالكم

كلامك كله المرادي خارج نطاق السطل

انهارده قعده عقل وحوار مع النفس

خد وادي مع نفسك في الكلام وبعدين قول انت وصلت لايه ورايك اييه

منتظر ردودكم ، اخوكم فودة المصري
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://as7abak.yoo7.com
lil_emi

avatar

انثى
عدد الرسائل : 2
العمر : 30
تاريخ التسجيل : 28/02/2008

مُساهمةموضوع: رد: 4 - حبرشني يا حبرشني, انسي يا معلم القعدة المرادي ناااااااار   الأحد مارس 02, 2008 2:14 am

سيبك من تيتو دا حيضيعك
ههههههه
لا بس بجد عمرها ما كانت الكرامة واحترام الذات متناقضة مع الستايل
بالعكس
انت ممكن تلبس اخر موضه ويبقى شكلك محترم اوي
بس موضة عن موضة تفرق
وانت وشطارتك في انك تاخد الي انت عاوزه منها والي يعبر عن مبادئك
مش تقليد اعمى وخلاص
والاهم انك لما تقرر تعمل حاجة لازم تحط في اعتبارك اول نظرتك انت لنفسك
مش نظره البنات او الناس عموما ليك
لانك مستحيل تقدر ترضي الناس لو مكنتش انت نفسك راضي عن الي بتعمله
لان فاقد الشيء لا يعطيه
وبس

وميرسي اوي عالقعده الجامده واسلوبك اكتر من رائع Wink
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
Foda
Admin
avatar

ذكر
عدد الرسائل : 229
العمر : 30
الموقع : www.as7abak.yoo7.com
العمل/الترفيه : Writing - Acting
المزاج : مجروح
تاريخ التسجيل : 15/02/2008

مُساهمةموضوع: رد: 4 - حبرشني يا حبرشني, انسي يا معلم القعدة المرادي ناااااااار   الأحد مارس 02, 2008 7:11 pm

مش عارف اقولك ايه انتى دايما رافعه من معناوياتى
بس على فكرة انا مقصدش انى انا اللى بهتم بنظرة البنات و ليا و الموضه المواضيع دى اغلبها حصلت مع ناس صحابى
و يارب تفضلى متبعانا دايما

و مرسيى مرة تانية يا أيمى

_________________
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://as7abak.yoo7.com
emy
وسام عضو مميز
وسام عضو مميز
avatar

انثى
عدد الرسائل : 33
الموقع : www.as7abak.yoo7.com
تاريخ التسجيل : 24/02/2008

مُساهمةموضوع: رد: 4 - حبرشني يا حبرشني, انسي يا معلم القعدة المرادي ناااااااار   الأحد أبريل 06, 2008 11:33 pm

بص ياعم فوده عمره ماكان باللبس ثم اهم حاجه احترامك لنفسك اولا وبعدين احترام الناس ليك
وعلى فكره البنات مش كلهم زي بعض انا اعرف بنات كتير مايحبوش غير الشباب اللي بيلبس بدل
وكرفتات ومايحبوش اللبس الكاجوال والروش مش معناه انهم خنقه بس هما كده بيقولو وجاهه ,هيبه وكده يعني
وعلى فكره في بنات ما بتحبش السهوكه والتسبيل والحاجات دي وخصوصا المياعه الحاجات دي مش للرجاله
يعني من الاخر سيبك من تيتو
وعلى راي المثل (كل ما تشتيهه نفسك والبس ما يليق بين الناس)
يعني من الاخر طمن صحبك وقولو يرجع زي ما كان وان لسه في بنات محترمه بمعنى محترمه ها وبس
وشكرااااااااااااااااااااااااااااااااااااااااااااااااااااااااااااااااااااااااا
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
Foda
Admin
avatar

ذكر
عدد الرسائل : 229
العمر : 30
الموقع : www.as7abak.yoo7.com
العمل/الترفيه : Writing - Acting
المزاج : مجروح
تاريخ التسجيل : 15/02/2008

مُساهمةموضوع: رد: 4 - حبرشني يا حبرشني, انسي يا معلم القعدة المرادي ناااااااار   الإثنين أبريل 07, 2008 7:43 pm

اكيد لسه فى بنات محترمه .. بس تحسى انهم بعاد عنك و مش حتلائيهم

ربنا يستر علينا منهم ان كيدهن عظيم

هههههههههههههههههه

_________________
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://as7abak.yoo7.com
 
4 - حبرشني يا حبرشني, انسي يا معلم القعدة المرادي ناااااااار
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
www.The-Pain.yoo7.com :: المنتديات العامة :: قعدة مزاج-
انتقل الى: