الرئيسيةالتسجيلدخول

شاطر | 
 

 العنطوووووووووووووظ !!!!

اذهب الى الأسفل 
كاتب الموضوعرسالة
Foda
Admin
avatar

ذكر
عدد الرسائل : 229
العمر : 30
الموقع : www.as7abak.yoo7.com
العمل/الترفيه : Writing - Acting
المزاج : مجروح
تاريخ التسجيل : 15/02/2008

مُساهمةموضوع: العنطوووووووووووووظ !!!!   السبت مارس 01, 2008 2:27 am

امسيه جميله !!

او هكذا تهيأ لنا ذلك ، فما اجمل من جو الشتاء ليلاً عندما تجتمع الاصحاب ليدفع كل منهم الدفئ في عروق الاخر .. هذا الدفئ الجميل الذي يسري في الاوصال متحدياً كل عوامل التجمد التي يبثها ليل الشتاء القارص !!!
وهذه ام كلثوم تترنم في المذياع لتضيف علينا جواً من الرومانسيه والحب الضائع قلما نشعر بهما الان ، ومزيد من الفحم المتقد الذي اعددناه لنمضي سهرتنا المعتاده
اذن فهي حقاً لامراء في ذلك .......... انها امسيه جميله !!


المعلم حنفي : من زمان يا جماعه مقعدناش قعدة حلوه زي دي

رمزي بيه : عندك حق يا معلم الفتره اللي فاتت دي ضيعنا علي نفسنا اوقات جميله كنا ممكن نقضيها

انا : القعدة حلوه بوجودنا مع بعض يا جماعه والله انا سعيد اوي انهارده

سيد افندي : شايفين ام كلثوم بتقول ايه >> الحب كله حبيته فيك الحب كله ... وزماني كله انا عشته ليك زماني كله .. حبيبي قول للدنيا معايا ولكل قلب بدقته حس ، يا دنيا حبي وحبي وحبي ده العمر هو الحب وبس

انا : الله عليك ياعم سيد الله

المعلم حنفي : ياااااااااااااااااااااه رجعتوني لايام زمان ايام ما كنا بنتلم كلنا اول خميس في كل شهر نستني الحفله بتاعت الست كانت البلد كلها تبقي فاضيه كله قاعد مستني الست واغنيتها الجديده

رمزي بيه : كانت ايام يا معلم مش ممكن ترجع تاني

سيد افندي : رغم ان العيشه كانت صعبه ايامها الا اننا كنا راضيين ومبسوطين واقل حاجه بتسعدنا

انا : عيشه ايه اللي صعبه ياعم سيد ده انتوا كنتوا ايام الرخص امال احنا بقي نقول ايه اللي العيشه علي ايامنا نار ولا في شقق ولا وظايف ولا عارفين نتجوز ولا عارفين نعيش حتي

سيد افندي : انتوا اللي عناطيظ والغرور راكبكم ايامنا كنا بنرضي بقليلنا

المعلم حنفي : سيد افندي كلامه مظبوط تقدر تقولي يا مصري انت متجوزتش ليه لغايه دلوقتي ؟؟ اظن حتقولي الشقه والشبكه والعفش والكلام الفارغ ده ......... ابدا يبني زمان كان الراجل يجوز بنته للي يستحقها وياتمنها عليه من غير العنطظه الكدابه بتاعت اليومين دول

سيد افندي : انا دخلت علي ام العيال وكان وقتها كل العفش سرير نحاس وطشت الومنيوم وحلتين وباجور وحصيره وكنا راضيين ومبسوطين واخر سعاده وهنا

انا : ههههههههههه ياعم سيد ده كان زمان وانت عاوزنا نتجوز كده برده انا حسيب تيتو يرد عليك .. مالك ياد ساكت ليه ما فتحتش بقك

تيتو : اصلي بصراحه عاوز اقول حاجه وخايف تزعقولي

انا : قول ياد عاوز ايه ؟؟

تيتو : بصراحه انا مبحبش اسمع ام كلثوم وعاوز اجيب نجوم اف ام !!

رمزي بيه : هههههههههههههههه ادي يا سيدي واحد من الجيل قال مبيحبش ام كلثوم قال ههههههه طب وانبي ده يتقاله ايه

انا : جتك خيبه يا تيتو ياريتك ما تكلمت خليك انت ساكت احسن

المعلم حنفي : اه يبقي احسن برده ..

سيد افندي : اسمعوا بقي الست وهي بتقول >>> الهوي العطشان في قلبي بيندهك يا ارق من النسمه واجمل من الملاك .. انت روحي وكل عمري ونور حياتي .. يا حياتي ايه انا بالنسبه لك


انطلقت الاهات الحاره من قلوبنا فقد استطاعت كلمات ام كلثوم العذبه ان تخترق وجداننا وان تعبر في دروب مشاعرنا لتنثر عبيرها العطر في كل مكان
وبرغم استمتاعنا وانصاتنا الا ان شيئا غريبا دفعني الي ان اسأل

- ياعم حنفي هي العيشه زمان كانت عامله ازاي ؟؟

المعلم حنفي : العيشه زمان يا محمد كانت ابسط مما تتخيل يعني اديلك مثلا الاكل ... مكنش في حاجه اسمها انا محتاره اطبخ ايه ولا حناكل ايه انهارده .. كانت الخيره بالموجود .. خضار ماشي فول ماشي في لحمه يبقي خير وبركه ولو مفيش يبقي مفيش مشكله والحياه بتمشي .. مش انهارده الاكل اشكال والوان والاقيلك العيل من دول يبقي سايب الاكل في بيتهم ونازل ياكل بره علشان اكل امه مش عاجبه ويقولك انا حاكل في كنتاكي ولا البتاع اللي بيقولوا عليه ده ... كان زمان اللي بياكل في مطعم ده اللي مالوش اهل والعازب ... بس تقول ايه بقي العنطظه خدت الناس ويقولولك الفقر .. فقر ايه اللي بتتكلموا عليه مانتوا اللي فقرتوا نفسكم !!!

سيد افندي : انا فاكر زمان كان الحلاق واحد في بلدنا كلها يلف علينا اول كل شهر .. كان معاه شنطه صغيره فيها عدته ويجي يقعد علي المصطبه اللي قدام البيت وكل الرجاله اللي في البيت تقعد قدامه واحد واحد يحلق نبتدي باكبر واحد لاصغر عيل في البيت ... وكان بياخد تمن الحلاقه رز او غله اخر موسم الزرعه وبعد ما نحصد ياخد اللي فيه النصيب .. دلوقتي الواحد لازم يحلق بعشرين جنيه كل اسبوع ولا اتنين علشان يظبط سوالفه ويحدد دقنه ويعمل شعره عفاريتي ويقولك اصل الفقر ... ماهو انت اللي فقرت نفسك يا عنطوووووظ

المعلم حنفي : كان زمان يا مصري البيت في بلدنا بيبقي بيت عيله كان يبقي الاب مخلف عشر عيال واللي يتجوز ياخد اوضه في البيت مفيش حاجه اسمها انا عاوز اعيش عيشه لوحدي ..... كله بيتجوز ويعيش في نفس البيت والستات كلها تطبخ مع بعض ويستنوا اجوازهم لما يرجعوا والغدا يتحط علي طبليه كبيره يقعد عليها الرجاله وطبليه تانيه يقعد عليها الستات ومعاهم عيالهم الصغيره ..... وكله كان عايش مبسوط وراضي ... حتي العيش اللي بتقولوا عليه فيه ازمه ومش لاقيينه مكنش زمان مشكله .. كانت الستات في البيوت ومن محصول السنه تعين شويه غله تطحنهم دقيق واول الشهر تتلم هي والستات في البيت يعجنوا ويخبزوا عيش يكفيهم الشهر كله ولا كان في افران عيش لا بلدي ولا فينوا ولا الهلمه اللي انت شايفها دي كلها ... كانت البساطه بتحل كل حاجه مش العنطظه الكدابه ... خليك كده قول لبنت متجوزه من بتوع اليومين دول اخبزي في بيتك حتقولك مكانش انعذر هو انت جايبني خدامه ، انت متجوزني ومسئول تعيشني احسن عيشه .. ده بدل ما تاكلني عيش زنجر !!! ( ناسف للخطأ لكن المعلم حنفي يقصد طبعا عيش كايزر )

رمزي بيه : زمان كان الراديو ده هو اختراع العصر ووسيله التسليه الوحيده وكنا نسمع فيه اذاعه القرآن الكريم او محطه مصر علشان نعرف الاخبار ويا سلام بقي لما تشتغل اغنيه لام كلثوم ولا لعبد الحليم كانت الدنيا كلها تبقي هس هس والكل بيسمع ... ولا كان في دش ولا فضائيات ولا بنات عريانه ولا فديو كليب كله مسخره ولا افلام هابطه ولا اغاني توجع الدماغ والعين .. كنا جيل اتربينا علي مباديء دلوقتي العيل لما يطلع يلاقي الستات عريانه قدامه في التليفزيون عاوزه لما يكبر يعمل ايه ؟ ما اكيد حيبقي عيل بايظ ... ولا البنات يا حسرتي عليهم .. كان زمان البنت تمشي في الشارع مغطيه وشها من الكسوف ومترفعش عينها من علي الارض دلوقتي يابني البت تقولك حريتي ومستقبلي وانا حره البس اللي البسه واكلم اللي اكلمه ومحدش ليه حكم عليا ومش عاوزه اتجوز دلوقتي اصلي لسه صغيره لما احقق ذاتي الاول ابقي افكر في الجواز .... كل ده يبني ومش عاوز الفقر يلازمنا !!!

سيد افندي : ولا الموبايلات اللي طالعه اليومين دول كان زمان مكنش في تليفون الا في دوار العمده او عند البقال دلوقتي العيل شايلي الموبايل ومصروفه كله يضيعه عليه ويدور يشحت بقيت الشهر والشاب يقولك انا مش لاقي شغل ولا يروح يشتغلك في كافتريا يمسح بلاط وياخدله 200 ولا 300 ملطوش اخر الشهر علشان يشحن موبايل بنصهم والنبي ده اسمه عقل خلاص الواد رجل اعمال واخبار البورصه بتجيله اول باول !! ماهو ده بقي اسمه فقير وعنطوووظ




واستمر الجدال قائما بيننا

بين الحاضر باناقته ورفاهيته والماضي بعراقته وبساطته

لكن وبرغم كل شيء يبقي لي كلمه

فعلا يا جماعه الشعب العربي هلااااااااس وعنطوووظ

يحب يعيش من غير ما يدي

وميهموش غير راحته وخلاص

ودايما تلاقيه شايل الهم ويعاني من الفقر

لانه هو اللي فاقر نفسه

بتتطلعاته الزائده عن الحد وامنياته اللي مبيسعاش لتحقيقها

بعدم رضائه بالواقع اللي بيعيش فيه وتمرده الدائم علي ظروف حياته

احنا بنشتكي من صعوبه الحياه وقسوتها

لكن احنا فين وناس زمان فين

لو فكرنا شويه حنعرف ان احنا منقدرش نعيش في ظروفهم اللي فاتت وقلنا جزء بسيط اووي اووي منها

يعني الحكايه كلها قناعه ورضا

مش عنـطظه فارغه وتمرد نتايجه دايما زياده الفقر والنحس اللي ملازمنا


محتاج مشاركاتكم وارائكم معانا في الموضوع ده وهل انت كنت تقدر تعيش زمان بصعوبته وقله امكانياته ؟ وهل كنت حتبقي راضي وسعيد ؟

اذا كانت اجابتك اه يبقي اوعي تشتكي من ظروف اليومين دول لانك المفروض تحمد ربنا كل لحظه وتحس انك عايش مليونير
اما اذا كانت اجابتك لا فاسمحلي اسالك طب كل الناس دي كانت عايشه ازاي ؟؟ واهالينا اللي خلفونا دول وصلوا وقدروا يعيشوا ازاي ماهم اكيد مروا الظروف دي وعاشوها لكنهم قدروا يوصلوا لغايه ما خلفوا عيال زينا كبرنا وبقي مش عاجبنا الحال وبقينا نتمرد من اجل التمرد

مخبيش عليكم الموضوع محتاج مصارحه مع النفس ... خد وادي مع نفسك في الكلام وقولي وصلت لايه


سلاااااااااااااام
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://as7abak.yoo7.com
 
العنطوووووووووووووظ !!!!
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
www.The-Pain.yoo7.com :: المنتديات العامة :: قعدة مزاج-
انتقل الى: