هو في ايه, والله حاجه تفقع المراره

بست ... بست
رمزي بيه
يا رمزي بيييييييييييييييييييه

- ده كان صوت سيد افندي ملوحاً بمنديله المحلاوي متعدد الاستخدامات والذي يصر علي استخدامه حتي في القرن الحادي والعشرين متعللاً بأن مناخيره خدت عليه
نظر لي رمزي بيه وابتسامته تملأ وجهه وهو يقول : ده سيد افندي وصل اهو استني أما اقوم اجيبه

- كنا نجلس في احد الكافيهات التابعه لاحد الفنادق ذات الخمس نجوم - طبعاً علي حساب رمزي بيه - وقد اخدت مكاني الي جانب رمزي بيه في مواجة المعلم حنفي - بصراحة علشان بحب اشوف تعبيرات وشه في المواقف اللي زي كده ، ان جيتوا للحق بيموتني من الضحك - أما تيتو فقد تمنينا جميعاً أن توافيه المنيه او يصاب بأزمة قلبيه علي اقل تقدير قبل أن يصل الينا وذلك حيث انتشر في المكان مجموعة من الفتيات من نوعية حبيبي يا مدلع ولع فيا ولع مما ينذر بعواقب وخيمة اذا اجتمع معنا تيتو السفيه والكفيل بأن يجعل فضيجتنا بجلاجل وجرستنا بحناجل كما قالها القدير عادل امام .

- انطلق رمزي بيه مهرولاً ليأتي بسيد افندي الذي وقف متصلباً كمن صعقته الكهرباء واخذ يتصبب عرقاً رغم برودة الجو ، زائغ العينين تائهاً ، لم يكن من السهل علي سيد افندي الموظف البسيط ذو البدلة الرمادية خاوية الجيوب والتي شاركته حياته أن يتفهم أن الأمر بسيط وكل ما عليه أن يدخل بخطوات ثابته ليأخد مكانه بجانبنا علي الطاولة وأنه سوف يخرج حياً دون ادني خسائر ، لكن رمزي بيه طمأنه أن الامور علي ما يرام

- جلس سيد افندي بجانب المعلم حنفي الذي اصر علي ارتداء الجلباب البلدي واللاسه مما جعل رواد الفندق يتسائلون كيف اجتمعت هذه المجموعة الغريبة ثري وسيم ، وشاب ، رجل يرتدي جلباباً و كهل يبدو عليه الاضطراب ... ومما اثار سخريتي هو ماذا سوف يقولون عندما يأتى صديقنا اللدود تيتو رفيق القعدة وهو بالتأكيد حاله شاذه عنا لكن سرعان ما اندمجت معهم في الحديث حيث اثارت انتباهي كلمة عابرة حائرة القاها سيد افندي دون وعي .. مجرد كلمة لكنها بالفعل تستحق ان انتبه اليها
هو في ايه ؟؟؟
قالها وهو ينظر يمنة ويساراً متعجباً فنظرت اليه قائلاً : في ايه فايه بالظبط يا عم سيد ؟؟
- ايه اللي بيحصل ده يا بني وايه الناس دي واحنا ايه اللي جابنا هنا اصلا
- ضحك رمزي بيه قائلاً متخافش يا سيد افندي انهارده علي حسابي متشيلش هم انت
- المعلم حنفي ( مش الفكره يا رمزي بيه بس بجد انا مش ليها لازمة الفشخره الكدابة دي ما كنا قعدنا عالقهوة عندنا احسن ولا في البيت عند محمد المصري )
- رمزي بيه ( يا جماعه احنا من زمان متقابلناش واهو تغيير بردو )
- سيد افندي ( يعني عاجبك كده قلة القيمة دي ، ايه البنات دي قاعدة كده ليه وايه اللي هما لابسينه ده )
- انا ( يا جماعه خلاص بقي عادي يالا شوفوا حتشربوا ايه انا عن نفسي حاخد نيسكافيه )
- رمزي بيه ( وانا كمان حاخد نيسكافيه )

واخذ كل من المعلم حنفي وسيد افندي يتسائلون عن جودة المشروبات وعن اسعارها فترة ليست بالقليله حتي هداهم تفكيرهم الي أن الشاي ابو فتله هو الاقل ضرراً ها هنا .

- انا ( بس تصدق يا سيد افندي كلمتك عجبتني اوي لما قلت هو في ايه )
- سيد افندي ( معلش يابني منا مش واخد عالجو ده بردو .. اعذرني )
- انا ( لا مقصدش ياعم سيد هو انا يعني اللي ببات هنا .. اصل انا جت في دماغي كام حاجه كده من اللي بتحصل في البلد اليومين دول )
- رمزي بيه ( متشغلش بالك انت يا محمد باللي بيحصل في البلد اصل طولها زي عرضها )
- المعلم حنفي ( لاء ازاي يا رمزي بيه .. طولها مش زي عرضها ولا حاجه .. يعني مثلاً يرضيك اللي بيحصل ده في حكاية الدستور اللي عايزين يغيروه بالعافيه .. دي حاجه بده ميتسكتش عليها )
- سيد افندي ( يعني حتعمل ايه يعني يا معلم .. رمزي بيه عنده حق طولها زي عرضها )
- انا ( يا جماعه ازاي بس .. مش دي بلدنا برده ولا احنا من الهند .. طب سيبك من حكايه مواد انتخاب رئيس الجمهورية خلينا في حكاية قانون مكافحة الارهاب .. هو احنا كنا عارفين نعيش في قانون الطواريء لما حيجيبولنا الاسخم منه ...ده اي ظابط في القسم دلوقتي عايز يسحل اي حد حيسحله والحجه مكافحة الارهاب )
- سيد افندي ( يابني امشي عدل يحتار عدوك فيك .. هو ده اللي انا اعرفه )
- انا ( ياعم سيد هو مين عدوي ده .. الشرطة اللي المفروض بتحميني حتبقي عدوي .. بدل ما توفرلي الامن توفرلي الرعب .. ده مش اسمه كلام ده )
- المعلم حنفي ( وبرده ليه يعني نفضل طول عمرنا مش عارفين نختار رئيس لينا هو احنا خلاص يعني ملطشة الشعوب .. ده موريتانيا يا جدعان المواطن فيها ليه كلمة )
- رمزي بيه ( يا عم حنفي متقلبش علينا المواجع خلينا ساكتين وكاتمين في نفسنا .. محدش يفتحني احسن انا في قلبي كلاكيع وكلاكيع من الحكومة )
- انا ( ورفض واستياء في مجلس الشعب وناس بتقول لاء .. وبدل ما ياخدوا بكلامهم او حتي يقنعوهم يضربوا بكلامهم وارائهم عرض الحيطة وهما ممثلي الشعب يعني احنا .. ويقدموا معاد الاستفتاء كمان .. هي الحكايه عافيه بقي ولوي دراع .. طب وعلي ايه استفتاء بقي ما كانوا غيروه وخلاص طالما اللي في دماغهم هما اللي بينفذوه )
- رمزي بيه ( والمشكله الحكومة بتعامل الشعب زي العيال الصغيرة كل ما يحبوا يعملوا مصيبة يشغلونا بحاجه .. مخدتش بالك انت من حكاية اسري 67 والقلبان اللي عملوه عليها .. بيتكلموا عن حاجه فات عليها اربعين سنه وقلم احنا ردينهلولهم .. طب ما كل سنة كام واحد يتقتل عالحدود ولا حد بيفتح بقه .. ولا هما قاصدين يشوشوا علينا علشان نتلهي في اي حاجه )
- سيد افندي ( ولا حكاية القضاة الفتيات دي .. اخر زمن والله ... قال ايه بنات المستشارين يبقوا قضاة .. ده من قلة الرجاله في البلد يعني )
- المعلم حنفي ( يا جماعة هو في ايه في البلد يعني عدل مشفتوش حكاية هاله سرحان وفتيات الليل زي ما يكون احنا البلد الوحيده اللي فيها دعارة والعالم كله العفه والطهاره )
- انا ( ده احنا بقينا ملطشه للعالم وسائل الاعلام .. هو احنا بقي لينا كرامة في وسط العالم .. ده بره دلوقتي لما يحبوا يشتموا المصري يقولولو يا مصري .. بقت كلمة مصري شتيمه دلوقتي )
- رمزي بيه ( وعايز يشيل الاشراف القضائي من علي الانتخابات ... ناقصه هي تزوير .. طب ليه اصلا الانتخابات .. ما نمشيها ودي كده مع الحكومة يعملوا اللي هما عايزينه ويسيبونا في حالنا ناكل عيش .. متفهمش بقي هو بيصفي حساباته مع القضاه ولا قاصدين يبعدوهم عن طريق جمال مبارك ولا ايه الحكاية بالظبط )
- انا ( شفت طن الحديد بكام .. شفت طن الاسمنت بكام .. مين يقول مصنع اسمنت يكسب 7 مليار في السنه .. ليه يعني .. تكلفة الطن 115 جنيه يتباع ب 350 .. طن الحديد ب 4000 جنيه .. واحمد عز واكلها في كرشه )
- المعلم حنفي ( الواد ابني راح ياخد كام فدان في الصحرا قال ايه عايز يستصلحهم زي ما الحكومة بتقول ... بقالوا تلات سنين بيجري عالورق مش عارف يخلص حق ولا باطل )
- رمزي بيه ( بيقولك حيخلطوا العيش بالحديد .. مع ان الدكاترة بتقول انه حيسبب مشاكل كبيره علشان الحديد مع السخونه بيتأكسد وبيبقي مادة مسرطنة .. قال يعني العيش ناقص .. مش كفايه كل الاكل بقي مش نافع دلوقتي .. ماهم بيزرعوا بذور مهرمنة وبيرشوها بمبيدات مسرطنة ويرووها بميه صرف صحي )
- انا ( ههههههههههههههههه ولا سفاح المعادي اللي دوخ الأمن وراه وبرده معرفوش يمسكوه )
- سيد افندي ( احنا حنقعد نعد بقي البلد فيها ايه .. يبقي مش حنخلص )
- انا ( ياعم سيد ادينا بنفضفض هو احنا ورانا ايه .....ههههههههههههههههههههههههههههه الواد تيتو جه اهو قفلوا بقي عالسيره دي بدل ما يجي يتحفنا برأي من ارائه الحكيمة كالعاده وهي مش طالبه شلل )

- تيتو ( هااااااااااااي يا جماعه ازيكم ... شفتوا الخبر التحفه .. ده انا لسه عارف وانا جاي في السكه ... واحده صاحبتي اتصلت بيا بتقولي ... انا مكنتش مصدق بس اتأكدت من واحده صاحبتي تانيه )
- انا ( ايه يا تيتو علي الله يكون حاجه كويسه )
- تيتو ( جاد شويري ..... حيعمل قناة فضائية اباحية .. لاول مره قناة عربية اباحية ...... اخيراً .. ده الواحد زهق من الاوروبي وسنينه .. عايزين ندوس بالعربي بقي )

كفاية كده بقي يا اخوانا
تعبتوني